ConcellosO BarcoÚltima hora

O Barco cederá un local para crear unha Unidade de documentación e estranxeiría

Así o vén de aprobar a Corporación municipal no pleno celebrado na tarde deste xoves

Publicidade
Un dos momentos da sesión plenaria do Barco./ Foto: A.R.

 

Por unanimidade saía adiante no pleno municipal do Barco deste 3 de xuño o punto relativo a cesión dun local municipal a favor da Dirección Xeral da Policía (Ministerio do Interior-Administración Xeral do Estado) para a instalación dunha unidade de documentación e estranxeiría.

Trátase dun local baleiro, situado no segundo andar do Edificio Multiusos, duns 93,07 m2 construídos. “Será unha concesión por 5 anos prorrogables anualmente”, explicaba o voceiro municipal do PSdeG-PSOE, Aurentino Alonso, indicando tamén que entre as obrigas do Concello figuran a de facer obras para adaptalo para o seu uso como oficina de documentación, así como a súa conservación, limpeza e gastos de electricidade, principalmente.

A proposta recibía o apoio da oposición, tendo en conta que nesta sesión non estaba o concelleiro de Riada Cidadá. Así o edil do BNG, Suso Vilasánchez, sinalaba que “a contía e as obrigas” desta cesión “teñen escasas importancia e o beneficio social é moito”. De maneira similar se manifestaba, a portavoz municipal do PP, Sabina Aguado, “é un servizo necesario, pedido, e todo o que sexa facilitar que sexa aquí parécenos ben”.

Tamén o resto de puntos da orde do día do pleno saían adiante por unanimidade. Entre eles estaban a denominación e regularización de numeración dalgunhas vías da zona coñecida como “O Serro” e no diseminado de Vilobal.

Ademais resultaban aprobadas por unanimidade dúas mocións presentadas polo BNG, nunha delas pedíase o impulso da delimitación definitiva do Camiño de Inverno e na outra que o Concello do Barco amose “a rotunda oposición á intención do goberno central de establecer peaxes nas autovías de titularidade estatal, por considerala unha medida regresiva que establece barreiras económicas no acceso á servizos básicos como son as infraestruturas viarias, porque incrementa a inseguridade viaria e porque supón un atranco para o desenvolvemento económico e a cohesión social de Galiza”.

Neste último caso, o voceiro socialista, Aurentino Alonso, matizaba que o voto a favor do seu grupo quedaba condicionado que isto non se aplique “na actual conxuntura económica de crise”.

 

A Corporación barquense durante o pleno da tarde do 3 de xuño./ Foto: A.R.

 

Apertura da piscina climatizada

Xa no punto de rogos e preguntas, o alcalde do Barco, Alfredo García, sinalaba, respostando a unha cuestión formulada polo edil popular Antonio Melo, que a piscina climatizada do Barco abrirá as súas portas entre finais de setembro e primeiros de outubro. “A piscina está lista para abrir. En setembro a empresa porase a traballar para poder estar a pleno rendemento a finais de mes”, indicaba o rexedor.

Petición do Día das Letras Galegas para Florencio Delegado Gurriarán

No pleno o alcalde barquense tamén se daba lectura a unha declaración institucional, apoiada polos catro grupos políticos municipais (PSdeG-PSOE, PP, BNG e Riada Cidadá), na que o Concello do Barco se suma á iniciativa promovida polo proxecto cultural As Letras de Florencio en apoio da candidatura do poeta vilamartinés Florencio Delgado Gurriarán para que se lle adiquen as Letras Galegas do 2022.

Artigos relacionados

Back to top button