En portadaenBarcArteÚltima hora

O Barco, escenario do 2º Festival de Instalacións Artísticas do 7 ao 29 de setembro

Esta iniciativa, coordinada por Jorge Barredo co apoio da Concellería de Cultura do Barco, incluirá nove instalacións (oito delas na rúa) e unha exposición colectiva na Sala Abanca

 

A creación máis fresca e emerxente tomará as rúas e prazas do Barco entre o 7 e o 29 de setembro no marco do 2º enBarcArte, Festival de Instalacións Artísticas no contexto urbano. Nesta nova edición a iniciativa amplía o seu número de autores (ata un total de 19) e de obras e reforza a presenza valdeorresa (con dez creadores da comarca). Así o destacaban a concelleira de Cultura do Barco, Margarida Pizcueta, e o curador do festival e tamén artista, Jorge Barredo, na presentación do programa do 2019.

“Este festival rompeu un pouco o ano pasado o que foi a dinámica das rúas do Barco a través da arte. O que se busca con el é dar a oportunidade tanto a artistas de fóra como da comarca para que poidan expoñer dun xeito moi explícito as súas obras e ademais é unha forma de embelecer a paisaxe urbana da vila do Barco”, indicaba a concelleira de Cultura, quen detallaba que serán oito instalacións as que poderán verse en diferentes rúas e prazas, complementadas con outra na Praza de Abastos e cunha exposición colectiva, titulada “As vidas humanas”, que estará instalada na sala Abanca (na praza do Príncipe).

 

Mapa de localización das diferentes instalacións que figura no folleto do festival.

O curador de enBarcArte incidía no carácter reivindicativo dalgunhas das pezas desta edición como é o caso de “Réquiem”, do colectivo Las Viudas del Planeta, que se situará na praza do Concello do Barco, mentres que outras apostan por fomentar a interacción co espectador, que poderá entrar nelas, sentarse ou incluso pintalas. “Isto supón unha interacción coa obra e fai que a arte non sexa estática”, matizaba Margarida Pizcueta. Este será o caso de “Eco-Folie” (na praza do Concello) da creadora vasca Surya Namaskar ou de “Igloo” (praza Maior) do valdeorrés Griseo.

Ademais durante os días do festival poderá visitarse na sala Abanca a exposición “As vidas humanas”, cuxa inauguración está prevista para o sábado día 7 ás 19:30h. O seu plantexamento e temática contrasta “coa da pasada edición, que era moi abstracta. Neste caso o tema é moi concreto, pero tamén o suficientemente amplo”, comentaba Jorge Barredo, que nesta elección inspirouse nun debuxo co título “As vidas humanas” de Roberto Álvarez, un dos creadores que expoñen nesta colectiva.

Fotos: Ángeles Rodríguez.

 

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close