Bacallau ao cubeto ou á tona, sardiña rechea de pementos, polbo con pataca cocida ou zorza de porco celta sobre leito branco. Son só algunhas das case vinte propostas diferentes de pincho estrela que, ao prezo de 1,5 euros, poderá degustarse entre os días 14 e 24 de xaneiro na VI Ruta de Pinchos “O Barco Vai de Viños”.
Esta iniciativa, que promove O Barco Centro Comercial Aberto e a Asociación Empresarial de Valdeorras (AEVA) en colaboración co Concello barquense, presentábase na mañá do 12 de xaneiro nun acto celebrado na praza de abastos da vila. Nel amosábanse boa parte das suxerencias culinarias que, en cuestión dunha semana, poderán degustarse neste percorrido que estará estruturado en tres zonas.
Dende hai uns días nos locais de hostalaría participantes xa se pode recoller un folleto informativo que inclúe información sobre os pinchos e tamén sobre a ubicación dos diferentes establecementos, tal e como explicaba a presidenta do Barco CCA, Sandra Moldes, na presentación. Ademais, co fin de fomentar a participación nesta ruta, haberá premios. No traxecto polos locais cada participante levará un boleto cuxos apartados poderá ir selando nos establecementos e tras consumir o seu pincho. Cando obteña o selo dun mínimo de cinco locais da ruta poderá entrar no sorteo de catro ceas para catro parellas. Para iso deberá depositar ese boleto nunha urna que se instalará no Concello Vello do Barco (en horario de mañá) ata o 26 de xaneiro. Moldes tamén agradecía o apoio do Concello do Barco nesta ruta, así como o das empresas que colaboran e a implicación dos establecementos participantes.
Pola súa banda, a concelleira de Comercio e Turismo do Barco, Irene Dacal, destacaba a importancia desta iniciativa e animaba a veciños e participantes a sumarse a ela e a desfrutar deste conxunto de propostas gastronómicas. Xunto a edil, o alcalde do Barco, Alfredo García, resaltaba o esmero posto polos hostaleiros na elaboración dos pinchos e tamén a súa profesionalidade.
Máis información na edición en papel do Periódico O Sil
