O BNG da Rúa anuncia que dá “por finalizado o proceso de negociacións”

A través dunha nota de prensa os nacionalistas refírense a un “pacto previo á campaña entre PP e RUA” e critican a “deslealdade” do PSdeG-PSOE

A tres días vista da conformación da nova Corporación na Rúa, o BNG deste municipio vén de anunciar a través dun comunicado que dá “por rematadas as negociacións de cara a atinxir unha maioría alternativa ao Partido Popular para o goberno municipal”. É unha decisión que este partido político vén de tomar nunha asemblea da súa candidatura.

“Vai uns días o BNG fixo públicos os seus contactos co PSOE para tentar manter a unidade do bloque de esquerdas que gobernou o Concello estes anos”, din os nacionalistas que consideran que “BNG e PSOE debiámonos presentar ante a cidadanía como unha fronte común para manter un goberno de progreso. Optamos por esa vía aínda sabendo que coa baixada do PSOE nas eleccións do pasado día 26 de maio a suma de ambas forzas non era suficiente para confeccionar unha maioría alternativa ao PP polo que, en último termo, sería o RUA o que tería que definir publicamente se prefería apoiar a un goberno de esquerdas ou a un de dereitas. Tras os resultados electorais un goberno liderado polo BNG era a única alternativa viable a un goberno do PP”.

O BNG da Rúa prosegue indicando que, “tras varias reunións, o PSOE tense negado a unir os seus dous votos aos do BNG de cara a unha posíbel investidura. Por iso, e ante a negativa do noso socio natural a apoiar a nosa proposta decidimos renunciar a ningún outro movemento”.

“Sen embargo, o PSOE e o RUA si se teñen reunido para intercambiar propostas”, sinalan os nacionalistas que entenden esa “actitude” dos socialistas como de “absoluta deslealdade cara o goberno do que levamos formando parte catro anos”.

E matizan que o “BNG non se ten posto en contacto co RUA en ningún momento deste proceso por varios motivos. O primeiro e máis evidente é que nos consta, como repetimos ao longo da campaña electoral, que existe un acordo previo entre o PP e o cabeza de lista dos independentes”. E, porque ademais, “as súas políticas están nas antípodas das nosas. Para o BNG o máis importante sempre será A Rúa”.

Conclúen asegurando que o “BNG exercerá a partires do próximo día 15 o labor de oposición que lle asignou a cidadanía da Rúa con firmeza e honestidade” e que lles preocupa “a inestabilidade coa que nacerá este novo goberno que, con independencia da performance que se faga no pleno de investidura, constituirán RUA e PP”.

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies