PolíticaÚltima hora

O BNG da Rúa aposta por un “goberno de esquerdas” neste concello

A formación nacionalista vén de emitir un comunicado valorando a situación respecto aos posibles pactos postelectorais neste municipio valdeorrés

A falta dunha semana para a constitución da novas corporacións municipais e para a elección dos novos alcaldes, o BNG da Rúa vén de emitir un comunicado sobre os posibles pactos electorais neste concello valdeorrés, tendo en conta os resultados do pasado 26 de maio: nos que o BNG se mantivo con tres concelleiros, o PP baixou un, quedándose con catro, e o PSdeG-PSOE outro, logrando dous concelleiros, mentres que o RUA obtiña dous edís.

“O primeiro que queremos sinalar ante este panorama é a importancia do resultado obtido polo BNG sendo a única formación que repite resultados nun contexto no que pasamos dunha concorrencia ás urnas de só tres formacións políticas (en 2015) a outro no que foron cinco as siglas que se presentaron como elixibles ante a cidadanía da Rúa”, indican dende o BNG rues, cuxa cabeza de lista nas municipais era María Albert.

Neste contexto, “a priori e ante a inexistencia dunha maioría absoluta, ábrese un panorama de pactos no que distintas forzas políticas teremos que entendernos desde posicións diferentes para tentar atinxir o ben mellor para o noso Concello”, prosegue a formación nacionalista, “somos conscientes que a día de hoxe hai un grande interese cidadán por saber como se vai concretar o novo goberno municipal e queremos destacar que, aínda que non temos feito manifestacións públicas até o de agora, desde o primeiro momento estamos pulsando as opinións da xente nas rúas así como a do PSdeG-PSOE para tentar saber cal é o sentir xeral”.

Nese senso, o BNG da Rúa asegura que, tal como manifestaban durante a campaña, “seguimos a defender e a traballar na posibilidade dun goberno de progreso para A Rúa que continúe coa senda iniciada vai catro anos pola coalición BNG-PSOE e esa é a oferta que temos feito até o de agora aos nosos actuais socios de goberno, se ben é certo que aínda non nos deron o si. Entendemos que, até este momento, nos atopamos nunha situación na que a unión dos partidos que gobernamos A Rúa desde xuño de 2015 conta cunha maioría simple de cinco concelleiros fronte aos catro que ten o Partido Popular e ante un RUA que continúa a manifestar que non ten acordos pechados de antemán e que está disposto a falar e pactar con quen
ofreza a mellor alternativa de goberno para o futuro do noso Concello”.

No seu comunicado a formación nacionalista conclúe que “ante este conxunto de realidades reafirmamos que o BNG tentará até o último momento que A Rúa conte cun goberno de esquerdas, que respecte
a soberanía popular e que teña como único obxectivo o ben común e non os intereses privados”.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close