“Queremos ter a capacidade plena, a competencia exclusiva dos servizos ferroviarios para o que imos constituír un ente público ferroviario galego que xestione os servizos de proximidade”, aseguraba á cabeza de lista do BNG ás eleccións galegas, Noa Presas, nun acto reivindicativo dun novo servizo ferroviario para Galicia en Monforte de Lemos. Xunto a ela estaba tamén o número dous por Ourense, o valdeorrés Suso Vilasánchez.
Presas alduía á desfeita do actual servizo poñendo como exemplo que “para viaxar desde Ourense a Vigo se recomende pasar por Compostela porque se chega antes debido a falta de frecuencias para unha viaxe directa”. E insistiu en que “Galiza segue sen tren de cercanías”. Ante isto o BNG pretende renovar o modelo galego de transporte de viaxeiros cunha nova iniciativa: o Galtren.
“É unha aposta pola construción dunha rede ferroviaria moderna, compatíbel para o tráfico de persoas e mercadorías, que primara a mobilidade interior, e con conexións con Portugal e a Meseta”, segundo o BNG. O Galtren, segundo a proposta nacionalista, constituiríase como unha entidade plenamente pública, dependente do Goberno galego, onde se aglutinen todos os servizos ferroviarios que transcorren polo país.
