PolíticaÚltima hora

O BNG entra na precampaña das municipais

No Consello Nacional desta formación, celebrado o 15 de setembro, ratificábanse os candidatos á alcaldía nas sete cidades galegas, entre os que está Luis Seara en Ourense

 

A portavoz nacional do BNG, Ana Pontón, durante o último Consello Nacional desta formación política.

 

Ponse en marcha a maquinaria no BNG de cara ás eleccións locais do 2019.  A portavoz nacional do BNG, Ana Pontón manifestaba no Consello Nacional celebrado o 15 de setembro que esta formación política encara as eleccións municipais “coa tranquilidade de ter unha organización unida, solvente e cun proxecto claro para mellorar a vida dos e das galegas desde os concellos” e moi poucos, dixo, “poden dicir o mesmo”.

Ademais neste consello ratificábanse as candidaturas das sete cidades galegas proclamando candidatos e candidatas, a Francisco Jorquera pola Coruña, Iván Rivas por Ferrol, Goretti Sanmartín por Santiago, Rubén Arroxo por Lugo; Luis Seara por Ourense, Xavier Pérez Igrexas por Vigo e Miguel Anxo Fernández Lores por Pontevedra. Pontón resaltou que todas estas persoas “non foron escollidas por ningún dedazo, senón polo resultado dun proceso asembleario onde é a militancia quen decide”.

Para a nacionalista, a fortaleza do BNG son “os nosos gobernos municipais cun proxecto propio para Galiza” e neste sentido aludiu a Pontevedra como única “cidade referente internacional cun modelo propio” porque “mellorou a calidade de vida, reduciu a mortalidade por atropelos, reduciu as emisións contaminantes, apostou polo comercio local e pola nosa cultura e identidade”, contrariamente, outras só destacan pola súa parálise, como “Ourense incapaz de aprobar os orzamentos municipais ou polo despilfarro en luces para tapar a falta dun proxecto político para esa cidade”.

No BNG, engadía Pontón, “queremos concellos que ofrezan alternativas propias, centradas na nosa realidade, que reforcen a nosa identidade e autoestima como galegas e galegos. Concellos onde o galego e a nosa cultura sexa defendida e apoiada. Queremos concellos comprometidos co público, que garantan a boa xestión da cada euro que sae do peto das cidadás, e que non despilfarren en obras megalómanas e erradiquen calquera tipo de favoritismo”.

Pontón manifestou que “o BNG está a alza e iso vai notarse nas municipais” e abriu as portas “a todas as persoas que compartan con nós a necesidade de defender Galiza, o seu dereito a decidir e construír alternativas que melloren a vida das maiorías sociais”.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close