Publicidade
PolíticaÚltima hora

O BNG presenta un programa de goberno “para erguer Galiza” e que camiña “cara o local”

 

Autonomía financeira, autogoberno, aposta polos sectores produtivos, defensa dos servizos públicos e da igualdade real. Serán as prioridades dun goberno do BNG en Galicia. Así o adiantaba a súa portavoz nacional e candidata á presidenta da Xunta, Ana Pontón, durante a presentación do programa desta formación política ás vindeiras eleccións galegas, un acto no que estaba acompañada polos cabezas de lista das diferentes provincias.

É un programa de goberno para “erguer Galiza e prender o motor dun país parado pola falta de ideas do Executivo de Feixóo, un programa que un Goberno liderado polo BNG poñería en marcha a partir do 12X para a reconstrución económica e social, evitando que esta crise a pague unha vez máis a maioría social”, en palabras de Pontón.

“Hoxe Galiza ten un goberno sen ideas, sen impulso ao que se engade o atranco de sucesivos gobernos do Estado contaminados de centralismo que fai que Galiza perda, por iso urxe un cambio de rumbo da man dun BNG que confía no país e disposto a aproveitar todo o seu potencial”, continuaba Pontón, que destacou que unha das ensinanzas que deixa a crise da COVID19 é a necesidade de camiñar “cara o local, a economía verde, a sustentabilidade, apostando pola ciencia e o coñecemento: todo iso é o que representa o BNG”.

 

 

Para iso, presentou un programa de goberno “arredor de dez grandes principios co obxectivo de conseguir a reactivación económica e social a través dun gran acordo de país”. En primeiro lugar, autonomía financeira que pasa por “darlle a Galiza un novo modelo de financiamento que permita xestionar desde aquí todos os recursos e marcar as prioridades, en definitiva, que lle dea a Galiza a chave dos seus cartos, o que tamén inclúe unha banca pública que facilite que o aforro galego chegue ás familias e empresas”. En segundo lugar o BNG avoga por “combater a precariedade, actuando en cuestións como o acceso á vivenda ou en servizos básicos como subministro de auga, luz e electricidade”.

Tamén aposta o programa nacionalista pola I+D+i como “clave para unha economía competitiva, capaz de xerar riqueza e emprego de calidade”, e pola defensa da capacidade produtiva “cunha aposta polos nosos sectores estratéxicos, empezando por poñer os recursos do país ao seu servizo, por exemplo a riqueza eléctrica a través dunha tarifa eléctrica galega”.

O quinto principio inspirador do programa do BNG é a “defensa e blindaxe dos servizos públicos, en particular a sanidade pública e coidado dos maiores, cuestión urxente que a crise da COVID19 puxo máis de relevo que nunca. O BNG ten un modelo de residencias nas antípodas do PP no que o obxectivo é garantir o dereito a unha vellez digna, non se pode mercantilizar o coidado dos nosos maiores”, indicou Pontón.

En sexto lugar, Pontón mencionaba a igualdade real como prioridade transversal e a defensa da lingua. Finalmente, referíase á defensa dun “novo status político para Galiza, a comezar polo mínimo de esixir a transferencia de todas as competencias pendentes recollidas no Estatuto, pero con aspiración ao pleno recoñecemento como nación con dereitos políticos”.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close