Este partido anuncia que non colará na provincia de Ourense os carteis da candidatura nesta primeira noite de campaña
Como mostra de solidariedade coa veciñanza dos concellos afectados pola vaga de lumes e respecto polo traballo dos profesionais do servizo de extinción que seguen traballando, o BNG vén de facer público un comunicado no que insta “ás demais forzas políticas que se presentan por Ourense a suspender en toda a provincia as pegadas de carteis nesta noite electoral”.
Dende a formación nacionalista sinálase que “o mínimo que podemos facer as forzas políticas diante dunha catástrofe sen comparación nos últimos anos é facer este xesto e pasado o 25 de setembro, malia as diferenzas na análise e nas solucións, chegar a puntos de acordo para que non volte acontecer”.
“Van máis de 6.000 hectáreas queimadas en diferentes concellos da provincia, houbo desaloxos de aldeas e demostrouse que o modelo de loita contra o lume é insuficiente e require cambios profundos”, di Noa Presas, cabeza de lista do BNG por Ourense.
Neste senso, o BNG anuncia que non colará na provincia de Ourense os carteis da candidatura nesta primeira noite de campaña, “quedan 15 días para confrontar posicións e alternativas, non podemos comezar hoxe como se nada disto estivera pasando e non vísemos o fume que invade todo”, aseguran.