CulturaCulturaMúsicaÚltima hora

O Bolo e Monterrei, sedes da XXXII “Xuntanza Internacional de Gaiteiros”

Este evento desenvolverase os días 10 e 11 de xuño nos castelos destes dous municipios ourensáns
Imaxe da presentación da XXXII edición da “Xuntanza Internacional de Gaiteiros”, na Deputación de Ourense.

Gaiteiros procedentes de Galicia e de países como Irán, Armenia, Italia, Alemaña ou Portugal daranse cita a mediados de xuño nos castelos de O Bolo e de Monterrei. Será no marco da XXXII edición da “Xuntanza Internacional de Gaiteiros”, declarada de Interese Turístico e Cultural pola Xunta de Galicia.

Este evento cultural e musical celebrarase en dúas xornadas, o día 10 de xuño no Castelo de Monterrei e o 11 de xuño no Castelo de O Bolo. A presentación desta tradicional festa tiña lugar na mañá do 5 de xuño no Pazo Provincial. Nela participaban o vicepresidente da Deputación de Ourense, Rosendo Fernández; o director da Escola Provincial de Gaitas da Deputación, Xosé Lois Foxo; e os alcaldes do Bolo e de Monterrei, Manuel Corzo e José Luis Suárez, respectivamente.

Rosendo Fernández fixo un repaso pola historia da “Xuntanza Internacional de Gaiteiros”, a cal “naceu como complemento ás actividades da Escola Provincial de Gaitas da Deputación no ano 1986 no barrio da Ponte de Ourense, e desde entón foi percorrendo distintos concellos da provincia, achegando a nosa tradicional música a todos os recunchos da provincia”. Tamén matizaba que este evento constituíuse “ao longo dos anos como un foro internacional no que se dan cita destacados gaiteiros de diferentes países, traendo a Ourense desde as cornamusas máis primitivas ata as máis contemporáneas”.

O programa desta XXXII edición complétase con conferencias, exposicións e actividades de carácter científico. Asemade, este ano, a homenaxe será para José María Fernandez, Angelo Arribas e Henrique Fernandes, tres gaiteiros do norte de Portugal.

Durante o acto, o alcalde bolés Manuel Corzo amosábase agradecido polo feito de que “unha das xornadas da Xuntanza se desenvolva no Castelo do Bolo, rehabilitado no ano 2000, porque nos permite promocionar o noso municipio”. Pola súa banda, o alcalde de Monterrei lembrada que neste ano 2017 “cúmprense dez anos desde que se decidiu que o Castelo de Monterrei acollera de maneira permanente a Xuntanza”.

Ao remate da presentación, actuaron as cantareiras Ana Belén Rodríguez e Cristina Pumar, xunto ao gaiteiro Marco Foxo, compoñentes da Real Banda de Gaitas da Deputación de Ourense.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close