Imparable. O equipo sénior do Centro de Deportes Barco mantén a racha de vitorias coa terceira consecutiva, e un meteórico ascenso que o sitúa no terceiro posto da clasificación en terceira división.
O conxunto vermello sumaba os últimos tres puntos na tarde do 6 novembro en Calabagueiros ante o Bergantiños, no primeiro partido en casa para o gardameta Vicente. O equipo de Carballo (co ex xogador barquense Rodri nas súas filas) adiantábse no marcador cun temperán gol, pero lonxe de amilanarse os rapaces de Javi Rey reaccionaban logrando o empate co gol de Cristóbal.
Co 1-1 no marcador chegaba o decanso e con el os afeccionados presentes no campo no Día do Club degustaban castañas asadas no particular magosto do C.D. Barco.
Xa na segunda metade, malia o bo xogo dos visitantes, o porteiro local paraba un penalti do Bergantiños e xa na última xogada da tarde, Ivi Vales sentenciaba o partido co 2-1 final.
O conxunto barquense segue escalando postos na cabeza da clasificación. A próxima cita será o domingo 13 de novembro na Coruña ante o Silva S.D.
Fotos: Carlos G. Hervella /Mónica G. Bellver
