Coa entrada en vigor hoxe, martes 16 de agosto, da nova Lei do patrimonio cultural de Galicia o recoñecemento do Camiño de Inverno como nova ruta de peregrinación a Santiago de Compostela xa é un feito.
Coa aprobación da dita Lei coa que tamén queda recoñecido oficialmente o Camiño Portugués pola Costa “aténdese unha vella reivindicación dos colectivos relacionados con estas rutas xacobeas”, aseguraba a directora de Turismo, Nava Castro, no acto celebrado esta mañá en Rodeiro, engadindo “que esta nova normativa legal permitirá o mantemento dos valores esenciais do Camiño de Santiago e a posta en valor do patrimonio cultural asociado ás Rutas Xacobeas.
O recoñecemento do Camiño de Inverno é unha das novidades que presenta a Lei do patrimonio cultural, unha normativa que, en palabras do conselleiro de Cultura, Educación e Ordenación Universitaria, Román Rodríguez, “ademais de salvagardar os bens patrimoniais, foi feita para dar solucións ás persoas, en colaboración cos concellos”. Deste xeito, é preciso destacar que, con esta nova norma, garántese a máxima protección do patrimonio sobranceiro de Galicia, á vez que se axilizan e facilitan os trámites administrativos.
A de Inverno é unha ruta que comeza en Ponferrada (León) e segue a canle natural que marca o río Sil. Cun trazado duns 210 quilómetros que discorren polas catro provincias galegas, entra en Galicia pola comarca de Valdeorras, para despois seguir por Monforte e enlazar coa comarca do Deza, continuando pola Estrada ata chegar a Compostela. En total, percorre preto dunha vintena de concellos galegos.