O Camiño de Inverno que entra en Galicia por Valdeorras vén de dar un gran paso no seu percorrido cara a oficialización como Camiño de Santiago, con todo o que iso conleva.
Na sesión da maña do 26 de abril, o Parlamento de Galicia aprobaba a Lei do patrimonio cultural de Galicia, na que se recoñecen como rutas principais dos Camiños de Santiago, o Camiño Francés; o Camiño do Norte, a Ruta da Costa; a Ruta do Interior, tamén coñecido como Camiño Primitivo ou de Ovedo; o Camiño Inglés; o Camiño de Fisterra e Muxía; o Camiño Portugués; a Vía da Prata ou Camiño Mozárabe; e o Camiño de Inverno.
O artigo 73 da lei puntualiza que “poderán ser recoñecidas como Camiño de Santiago aquelas rutas das que se documente e xustifique convintemente a súa historicidade como rutas de peregrinación a Santiago de Compostela e a súa influenza na formalización da estrutura do territorio polo que transcorren”, abrindo a posibilidad de declarar BIC unha ruta se o solicitan a maioría dos concellos polos que transcorre.
Coa aprobación desta lei “demos un paso de xigante xa que o Camiño de Inverno, que é un ben cultural de todos, non só dos galegos senón de toda a humanidade, será incluído nos mapas oficiais de peregrinación a Santiago”, explica a presidenta da Asociación de Amigos do Camiño de Santiago por Valdeorras, Asunción Arias. Ela mesma, en nome da asociación valdeorresa agradece o labor “dos políticos, tanto do PP como da oposición, así como aos socios que levan loitado tanto polo recoñecemento do Camiño”.
A ese respecto, Asunción Arias adiantou que o o vindeiro 7 de maio no adro da Igrexa de Fontei (A Rúa) colocarán fito en homenaxe a Ramón García, presidente honorífico da asociación (fundador e alma mater do colectivo), polo seu labor a prol do Camiño de Inverno.
Ao pleno do Parlamento asistiron membros das Asociacións do Camiño de Santiago por Valdeorras e pola Ribeira Sacra.
