Máis alá do mitin central no Barco, en Valdeorras o BNG afrontou esta nova campaña de cara ás eleccións xerais do vindeiro domingo, cunha serie de reunións cos colectivos económicos e sociais.
Así, hai uns días o candidato ao Congreso dos Deputados polo BNG en Ourense, Francisco García, reuníase na Rúa co colectivo de emigrantes retornados e hoxe, 4 de novembro, participaba noutra reunión, na mesma localidade pero co sector do viño, “importante a nivel económico, produtivo e de potencialidade de cara ao futuro”.
Alí, García explicou que o motivo desta reunión é coñecer de primeira man a situación do sector na comarca así como as demandas e cuestións dos asistentes. Así, entre outros temas, falouse da necesidade do crecemento da DO especialmente no referente á superficie, “fai falta máis uva para elaborar máis viño porque o posicionamento no mercado é bo”, aseguraron preocupados ademais polas novas plantacións.
En ámbalas dúas xuntazas, o candidato nacionalista estivo acompañado pola deputada no Parlamento de Galicia Noa Presas e membros do Bloque en Valdeorras (os concelleiros na Rúa María G. Albert e Avelino Fernández, e no Barco Jesús Vilasánchez, ademais de Roberto Quiroga, suplente nas listas ao Senado).
Fotos: Mónica G. Bellver
