Co obxectivo de “convidar a tódolos ourensáns a compartir unha reflexión sobre a nosa cidade, o Ourense que somos e o Ourense que queremos ser”, na tarde do 7 de abril, a menos de dous meses das eleccións municipais o candidato socialista á alcaldía de Ourense, José Ángel Vázquez Barquero, presentaba a campaña “Pensa Ourense”.
No acto, Barquero explicou que esta primeira fase de reflexión para a xestión do Concello virá seguida dunha segunda chamada “Escribir Ourense” onde as ideas aportadas na primeira fase tomarán corpo no programa electoral. O proceso rematará cunha terceira fase denominada “Facer Ourense” que se desenvolverá ao longo da campaña electoral propiamente dita. “Primeiro pensamos, despois escribimos e posteriormente propoñemos facer Ourense dende a cabeza ata o corazón” dixo, engadindo que “será o noso propósito nesta campaña, seguir construíndo Ourense con cabeza e con corazón e dende esta oficina da agrupación municipal do PSdeG PSOE, queremos ser o altavoz e os portavoces do pensar e do sentir dos ourensáns” engadindo que “se algo queremos reivindicar dende a candidatura dos socialistas da cidade de Ourense é a defensa do público, recuperando o sentido das ágoras como espazo de debate, discusión e interacción cos cidadáns”.
No cartaz da campaña presentada polo candidato socialista, indícase a súa conta de twiter na que os cidadáns poden contactar con el, así como un numero de teléfono “ao que os cidadáns me poden chamar en calquera momento e poden enviar os seus comentarios a través de WhatsApp, co compromiso de atender e responder persoalmente a tódalas chamadas e mensaxes sen ningún tipo de filtro”. No cartaz tamén está o teléfono vermello que “queremos que sexa un símbolo desta campaña, a través do cal os cidadáns terán un fío directo comigo e coa nosa candidatura” dixo Vázquez Barquero que propón “unha campaña na que cremos, de contacto directo cos cidadans que está a ser e seguirá sendo unha máxima durante esta campaña electoral porque asi é como os membros da candidatura entendemos a política municipal e a acción política”.
Fotos: Carlos G. Hervella