A quinta edición do festival de música OurenRock Sound será o 23 de agosto no castelo da localidade ourensá de Ribadavia. O acto de presentación tivo lugar esta mañá na antiga fortaleza e contou coa participación do Presidente da Deputación, Manuel Baltar, do alcalde de Ribadavia, César Fernández, do director do festival, Rubén Álvarez e do presidente de Cruz Vermella Ourense, Felipe Ferreiro.
O cartel compóñeno os artistas Xoel López, Sés ou Os Amigos dos Músicos. Ademais, a celebración terá un importante compoñente social debido a que nesta edición, toda a recadación irá destinda a Cruz Vermella Ourense.
O presidente do goberno provincial quixo agradecer ao alcalde de Ribadavia “a dispoñibilidade para acoller o festival”. Pola súa banda o rexedor sinalou que a celebración do OurenRock Sound “situará en agosto a Ribadavia como centro da fervenza cultural e musical, un feito no que destaca o ámbito solidario desta edición”. O aforo estará limitado a un máximo de 400 persoas e, segundo o director, Rubén Álvarez, o evento realizarase “con todas as medidas de protección para o público”.
