A falta de seis partidos para o final da primeira fase nesta peculiar tempada en terceira división, marcada pola pandemia e as restricións, cada xornada conta coma se fose a última e tal como explicaba na entrevista publicada no número de febreiro de O Sil Deportivo o míster do CD Barco, Manolo Pérez, nunha liga tan curta como a deste ano “non vai haber marxe para relaxarse”.
Con esa premisa, na xornada 17ª que se celebraba na tarde deste sábado 13 de febreiro, sen público en Calabagueiros, o conxunto barquense saía ao terreo de xogo disposto a facerse coa vitoria que pretendía adicar ao capitán Rubén García, recentemente operado dun xeonllo. De feito o plantel facíase a foto previa ao partido con camisetas con mensaxes de ánimo. Mais as cousas non saíron segundo o esperado.
O partido disputado ante o Rápido de Bouzas foi máis ben lento, sen apenas ocasións para ningún dos dous conxuntos nunha primeira parte carente de acción na que foi expulsado o lateral esquerdo barquense De Pedro, por dobre cartón amarelo. Tralo paso polo vestiario mantíñase a dinámica en Calabagueiros e visto o visto sobre o terreo de xogo, o empate sería o resultado máis xusto, pero a falta dun minuto para o final do tempo reglamentario, no 89′, Adrián lograba coar un balón na rede defendida por Oviedo poñendo o 0-1 no marcador. Sen apenas tempo de reaccionar, o colexiado pitaba o final e o Barco perdía os tres puntos en xogo quedando con 23, a só un do Rápido.
O fútbol regresará a Calabagueiros en apenas catro días, o vindeiro mércores 17 de febreiro, cando se disputará o partido ante a UD Ourense aprazado o 24 de xaneiro por positivos de Covid no conxunto ourensán.
Con todo, a liga non se reanudará ata o día 28 cando se xogarán os partidos correspondentes á xornada 18º (O Barco viaxará ata Ribadumia, Pontevedra), xa que a Federación Galega de Fútbol elixía o domingo 21 para recuperar o resto de partidos aprazados ata agora polo coronavirus.
Fotos: Carlos G. Hervella.
