Despois de anos de reivindicacións, promesas que non chegaban a cumprirse e continuos retrasos, o CEIP Julio Gurriarán do Barco parece que vai ter finalmente o seu pavillón cuberto. A Consellería de Educación, Universidade e Formación Profesional ten programadas ata o ano 2021 obras en 8 centros educativos da provincia de Ourense, entre as que figura a do centro escolar barquense, que era o único da comarca que ata agora non dispoñía desta infraestrutura.
Así para o peche da pista no CEIP Plurilingüe Julio Gurriarán Canalejas a consellería destinará 441.424 euros, segundo se informa dende este departamento autonómico.
Dentro das actuacións da consellería na provincia inclúese unha previsión para a creación dun Centro Galego de Innovación da FP en Ourense, cun investimento de 3,5 millóns de euros. En calquera caso, está obra quedaría pendente dos acordos coa Deputación.