O CEIP Condesa de Fenosa aposta polo teatro para promover a conciencia social sobre os incendios

Os alumnos de 2º de Primaria porán en escena “María e o lume” o vindeiro 28 de maio no Teatro Lauro Olmo do Barco

A comunidade educativa do CEIP Plurilingüe Condesa de Fenosa do Barco de Valdeorras vai pouco a pouco poñendo o broche ás actividades enmarcadas no programa PITEAS. Desta volta tócalle o turno aos alumnos de 2º de Primaria, que o vindeiro luns 28 de maio,  representarán no Teatro Lauro Olmo a obra “María e o Lume”. Unha obra de teatro de creación propia, produto final do proxecto educativo “Investigalume” nacido a raíz da intensa vaga de incendios que tiveron lugar en Galicia en outubro do pasado ano.

Tal como explican dende o centro, a investigación centrouse en cinco grandes apartados: causas, consecuencias, prevención, medios de extinción e protocolo de actuación. “A colaboración co distrito forestal do Barco de Valdeorras resultou fundamental nesta investigación”, puntualizan, asegurando que o persoal deste distrito acercouse ao noso centro a dar unha charlas informativas e o alumnado visitou as instalacións en Viloira.

Coa información recadada elaboraron múltiples materiais como murais, lapbooks e mapas de pensamento en relación ao que se quería investigar e ao xa aprendido. Realizada a investigación e recompilados os datos, chegaron á conclusión de que lograr unha conciencia social ao redor desta temática era un dos mellores medios para loitar contra o lume e decidiron reflectir o aprendido nunha historia que amosar ao público. Así, os cativos, por equipos, crearon diferentes tramas narrativas e, unha vez escollida unha delas, puxéronse mans á obra para crear “María e o lume”. “O alumnado repartiuse en diferentes “equipos de expertos”: guionistas (que se encargarían de pasar esta historia a formato teatral), actores e actrices (para representala), figurinistas (encargados da maquillaxe e o vestiario), escenógrafos (encargados dos decorados), equipo técnico (son, luces e telón), publicistas (para o deseño de carteis e entradas), presentadores, equipo de taquilla e acomodadores.

Agora, con todo o traballo rematado e os ensaios finalizados sairán da aula e presentarán o seu traballo á sociedade barquense.

Fotos cedidas

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies