Un total de 160 centros de ensino, 20 deles na provincia de Ourense, foron seleccionados para participar neste curso nos sete programas do Plan de Emprendemento no Sistema Educativo de Galicia, Eduemprende, entre os que están o CEIP Plurilingüe Condesa de Fenosa do Barco de Valdeorras e o IES Carlos Casares de Viana do Bolo.
Eduemprende, é o plan marco de fomento do espírito emprendedor no sistema educativo de Galicia, e establece a estratexia de fomento da cultura emprendedora que a Xunta de Galicia transmite á comunidade educativa. A convocatoria deste curso incluíu sete programas: Actúa, Atrévete, EduTecEmprende, Implantación de ferramentas de medios de pagamento na FP, Finanzas para mortais, Grand prix financeiro e Preparados para o salto.
O CEIP Condesa de Fenosa participará no programa Grand prix financeiro (modalidade presencial), que ten como obxecto desenvolver actividades e xogos para que o alumnado aprenda, dun xeito activo e en primeira persoa, as primeiras pautas de como adaptarse a un orzamento e a importancia do aforro na vida. O programa vai dirixido a alumnado de 3º a 6º de Educación Primaria.
O IES Carlos Casares pola súa banda, faráo no de Finanzas para mortais, dirixido ao alumnado de 3º e 4º da ESO, 1º e 2º de Bacharelato e FP, que ten como finalidade fomentar a cultura financeira no sistema educativo, con actividades como talleres e charlas organizadas impartidas por persoal voluntario dunha entidade bancaria. Así mesmo o alumnado de Formación Profesional de Ciclos de Grao Superior de Administración e Finanzas recibirá a formación necesaria para incorporarse como voluntarios ás devanditas actividades.
