CulturaCulturaEducaciónÚltima hora

O CEIP do Bolo comeza o curso 2019/2020 sen a unidade de Infantil

CCOO reclama "políticas de natalidade de emprego tras unha década de precariedade no ensino"

Daniel Rodríguez, Responsable de Comunicación, Información e Cultura (Ourense), da Federación de Ensino de CCOO Galicia./ Foto: Mónica G. Bellver.

 

Como cada ano, unhas semanas despois do inicio do curso 2019/2020, a CCOO Ensino presenta os datos actualizados do seu “Informe de catálogos 2009/2019”, uns datos que no caso do oriente ourensán seguen preocupando ao sindicato, especialmente no que se refire á perda de aulas e por conseguinte de profesorado, en Educación Infantil e Primaria.

“Na última década pecharon colexios como o de Montederramo e escolas unitarias e perdéronse 26 aulas de Infantil en Primaria, unha barbaridade, xa que supón o 21%, o dobre do dato xeral da provincia”, explicou o responsable de Comunicación, Información e Cultura (Ourense) da Federación de Ensino de CCOO Galicia, Daniel Rodríguez, durante a rolda de prensa que daba na mañá do 25 de setembro. A ese respecto, o ano pasado eran os colexios de Vilariño de Conso e o CEIP Manuel Respino da Rúa os que perdían unha aula de Primara cada un, e neste curso tocoulle o turno ao CEIP do Bolo que perdía a única unidade de Infantil. “Levaba anos no tinteiro pero grazas ao bo labor dos docentes e do Concello no seu momento púdose manter pero agora xa resultaba imposible porque non se fai ningún tipo de política que permita poboar e que haxa nenos así que acaban pechando”, asegura Daniel, alertando de que perder a aula de Infantil supón “condear ao colexio ao peche nun período curto de tempo, porque é a base e o piar”. Esta perda, ademais do profesor correspondente supón a perda da dirección “agora mesmo o que hai é un responsable de centro”.

Con respecto ao profesorado, como consecuencia do evidente peche de aulas prodúcese a supresión de postos do traballo, o 22% en 10 anos “case triplica a da provincia co 8%”, puntualizan dende CCOO Ensino que leva anos “denunciando que a Consellería está a deixar morrer os nosos pobos e vilas, política que está a afectar gravemente á provincia de Ourense, ao ser o rural un dos nosos maiores valores. A perda dos colexios nos pobos é o comezo da perda do municipio”, sentencian.

 

Fachada do CEIP do Bolo co castelo ao fondo. /Foto: Mónica G. Bellver.

 

En Secundaria, os datos mantéñense bastante similares aos do curso pasado, destacando dende CCOO a “escasa oferta formativa da FP Básica, tendo en conta que preto do 20% do alumnado elixe esta opción para finalizar as ensinanzas obrigatorias”. Segundo explica o responsable de Comunicación, Información e Cultura (Ourense), esta é a única vía de escape para o alumnado que non vai ser capaz de superar 4º da ESO pola modalidade ordinaria  polo que “consideramos inaceptable que no oriente ourensán o alumnado só poida escoller entre Mantemento de Vehículos no Barco, Electricidade en Trives e Informática en Viana e A Rúa”. Ademais, CCOO Ensino demanda “a implantación de novos ciclos na nosa comarca que atendan o tecido industrial da zona, así como aqueles que permitan a continuidade formativa do alumnado nos nosos centros”, de feito denuncian que “centros como o IES Cosme López Rodríguez da Rúa solicitara o ciclo formativo de Grao Medio en Sistemas Microinformáticos e Redes para o curso actual, cunha previsión de 16-18 alumnos e a Consellería a rechazara no Consello Xeral de FP”.

E no que atinxe a infraestruturas, o sindicato mostra o seu “rechazo” á intención da Xefatura Territorial de Educación en Ourense de “trasladar o Centro de Formación e Recursos (CFR) do Barco ao IES Lauro Olmo; denunciando “un ano de mentiras por parte da Administración que prometeu en máis dunha ocasión que se incorporaría a segunda administrativa ao IES Lauro Olmo que a día de hoxe conta cunha soa que xestiona preto de 700 alumnos de diversas ensinanzas”.

 

Inicio de curso en Secundaria no IES Cosme López da Rúa. /Foto: Mónica G. Bellver.

 

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close