O Club Natación Valdeorras deixa a competición ao non poder adestrar polo peche da piscina climatizada

A dirección deste club tomaba esta decisión nunha asemblea celebrada a pasada semana, na que tamén se analizaba a situación tras o peche desta instalación deportiva municipal

Competición deportiva organizada polo Club Natación Valdeorras en abril deste ano na piscina climatizada do Barco./ Foto: Carlos G. Hervella.

Nesta tempada os membros do Club Natación Valdeorras non competirán a nivel autonómico como acostumaban facer ata agora. Víanse obrigados a tomar esta decisión “ante a imposibilidade de adestrar en condicións axeitadas tras o peche das instalacións aprobado en pleno polo grupo de goberno municipal e respaldado polo principal grupo da oposición o pasado mes de xuño”. Así o sinalan dende a súa directiva nun comunicado de prensa remitido na tarde do 8 de novembro.

Ademais lembran que os nadadores do C.N. Valdeorras viñan participando dende hai catro anos nas diferentes probas do calendario autonómico e que “por primeira vez puxeron a Valdeorras no mapa da natación galega”. Sen embargo, neste outono non acudirán a ningunha das competicións da Liga Máster, que comezaba en outubro.

A dirección deste club, que tamén dende hai catro anos organiza a Travesía Valdeorras, tomaba esta decisión nunha asemblea celebrada a pasada semana, na que tamén se analizaba a situación tras o peche da piscina climatizada. Ademais esta entidade amosaba a súa “preocupación pola desidia do grupo de goberno municipal para acondicionar e licitar a concesión dunhas instalacións pechadas o pasado mes de xullo. Catro meses despois, nin sequera se iniciou ningunha obra. Os reiterados incumprimentos no calendario previsto para poñer en marcha a instalación deportiva apuntan a que a súa reapertura retrasarase probablemente outros tantos meses. De ser esta a previsión máis optimista, o club podería participar aínda no campionato de verán que se celebrará en maio de 2019”.

O Club Natación Valdeorras recorda ademais que a piscina climatizada do Barco de Valdeorras foi inaugurada no 2011 tras un cuantioso investimento. As deficiencias na súa construción, din dende esta entidade deportiva, “obrigaron a pechala dous anos máis tarde para reparar o sistema eléctrico. Sete anos despois da súa inauguración, a infraestrutura require un nova investimento que supera os 200.000 euros”. E neste senso o Club Natación Valdeorras “cuestiona a responsabilidade do grupo de goberno municipal por asumir unhas instalacións con manifestas deficiencias”.

Esta asociación deportiva también considera que a piscina climatizada do Barco é “unha externalidade que redunda na saúde e benestar de todos os valdeorreses e un servizo imprescindible para unha poboación, xa de por si illada” e insiste en que “pode ser rendible se existe a vontade do goberno municipal de promocionala adecuadamente”.

Ademais, o Club Natación Valdeorras insta ao goberno municipal a que “deixe de divagar sobre a reapertura das instalacións a través dos medios de comunicación locais e anuncie datas concretas e cribles para a reapertura das mesmas. Ata que isto non se produza”, reiteran, este club “abandona a competición sine die“.

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies