O alcalde da Veiga, Juan Anta, reuniuse nesta mañá de 24 de xullo co conselleiro do Medio Rural, José González. O obxectivo desta reunión foi o de analizar posibles proxectos de mobilización de terras co fin de xerar unha actividade económica rendible.
Así, o alcalde solicitou a entrada da Veiga no Plan de pastos en extensivos da Xunta, ao que o conselleiro concedeoulle formar parte del. Este plan comeza este ano e ten como obxectivo fomentar a ordenación e posta en valor deste aproveitamento, á vez que se mellora a loita contra os incendios forestais. Tanto o alcalde como o propio conselleiro entenden que “o labor dos gandeiros é esencial para o futuro do rural galego, dado que son dinamizadores da economía rural e xogan un papel elemental para a prevención de incendios e para o coidado da natureza”.