EconomíaEconomíaÚltima hora

O Concello de Manzaneda decide denunciar á REE por incumprimento de convenio

Nese documento o grupo empresarial comprometíase a desmontar a antiga liña de Alta Tensión de 220 kw entre Trives e Aparecida e ata agora non o fixo. A decisión de demandala tomábase no último pleno municipal
O alcalde de Manzaneda, Félix Domínguez, e o deputado Davide Rodríguez, xunto á liña de alta tensión.

O Concello de Manzaneda vén de demandar a Red Eléctrica Española (REE) por incumprimento do convenio asinado no que se comprometía a desmontar a liña obsoleta de Alta Tensión entre Trives e Aparecida. Así o ratificaba o pleno do Concello de Manzaneda, presidido polo alcalde Félix Domínguez, que se celebraba este pasado 30 de novembro. “Xa con data de 1 de xuño do presente ano, o Concello mandoulle un requirimento a REE instandoa a desmontar de forma inmediata a antiga liña de 220 kw co fin de evitar os evidentes perxuízos que a súa existencia actual supón, non recibindo a día de hoxe ningunha resposta por parte da compañía eléctrica”, explican dende o Concello de Manzaneda.

Ademais dende esta administración local recórdase que “en setembro do ano 2009, Rede Eléctrica de España S.A., en base ao artigo 4.2 do Real Decreto 195572000, de 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica, proxectou o transporte de enerxía eléctrica de nova xeración en Galicia e Castela León. Argumentouse a necesidade de alimentar electricamente o futuro tren de alta velocidade Madrid-Segovia-Valladolid-Zamora-Ourense-Vigo, ademais de indicar a mellora da seguridade e calidade da subministración en Galicia e Castela-León e posibilitar a exportación da crecente produción de orixe eólica. Razón pola que procedeu á instalación da liña aérea de transporte de enerxía eléctrica, a 400 kV, dobre circuíto para conectar as subestacións de Trives (Ourense) e Aparecida (Zamora)”.

Na parte expositiva das estipulacións, asinadas entre o Concello e os representantes de REE, “ademais de diferentes compromisos, como o respecto ambiental e a reposición de posibles danos ao seu estado orixinario, sinálase que a nova liña de alta tensión de 9,780 quilómetros, substituiría á actual liña de transporte de enerxía eléctrica de 220 kV de simple circuíto. Afirmando taxativamente que esta última liña será desmontada unha vez que se puxo en servizo a futura liña eléctrica a 400 kV. É dicir, Rede Eléctrica de España S.A. comprometeuse no ano 2009 a retirar a liña aérea de transporte de enerxía eléctrica, a 220 kV, simple circuíto, situada entre Trives e Aparecida (Ourense e Zamora) unha vez que estivese en funcionamento a liña aérea de transporte de enerxía eléctrica, a 400 kV, dobre circuíto, que conectaría as subestacións de Trives e Aparecida, e cuxo trazado discorre parcialmente polo municipio de Manzaneda (Ourense)”, sinalan dende o Concello de Manzaneda.

Sen embargo, o compromiso non se cumpriu “e actualmente están en funcionamento, desde hai dous anos, e discorren polo municipio, unha liña de 400 kV (simple circuíto) e a antiga liña de 220 kV. REE cambiou o proxecto a un dobre circuíto 400kV/220kV sobre os mesmos apoios que non foi completado no tramo Conso-Trives no que se mantén as dúas liñas de maneira independente. En consecuencia, os veciños e veciñas de Manzaneda, entre outros, teñen que soportar, sete anos despois, dúas liñas de alta tensión ao seu paso por este municipio contravindo así os acordos alcanzados, o que resulta, de xeito evidente, unha anormalidade que debe corrixirse canto antes”, destacan dende o Concello.

Lémbrase tamén que no Parlamento galego, aprobouse unha proposición non de lei por unanimidade do grupo parlamentar de En Marea instando a Rede Eléctrica de España S.A., como transportista único e xestor da rede de transporte a “umprir, o máis axiña posible, co compromiso adquirido e proceder ao desmantelamento da liña aérea de transporte de enerxía eléctrica, a 220 kV, simple circuíto, no tramo Conso-Trives”.

Os incumprimentos de REE, “tanto cos acordos adoptados no Parlamento galego, como nos requerimentos do Concello de Manzaneda, obriga a este último a demandar a Red Eléctrica Española por incumprimento do convenio asinado no que se comprometía a desmontar a liña obsoleta de Alta Tensión entre Trives e Aparecida”, segundo o Concello.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close