O Concello de Ourense desenvolverá durante o período estival un plan de potencialidades do uso da xeotermia. Este plan é en colaboración co Instituto Tecnolóxico e de Enerxías Renovables de Tenerife (ITER) e ten como principal obxectivo o de “ser unha ferramenta de axuda ao desenvolvemento de proxectos xeotérmicos na cidade, en especial nas zonas de maior presenza termal, poñendo en valor o binomio termalismo e enerxía sustentable, como elementos diferenciadores de Ourense no espazo europeo”.
O acordo tivo lugar hoxe, día 11 de xullo, nunha reunión entre o alcalde, Gonzalo Jácome, o tenente de alcalde, Jorge Pumar, e o director do traballo e de área de medio ambiente de ITER, Nemesio Pérez. Así, o proxecto desenvólvese dentro de Geoatlantic, primeiro proxecto do programa Interreg Área Atlántica que aposta pola xeotermia como enerxía final de uso público e privado e o seu achegamento á sociedade.
