ConcellosÚltima hora

O Concello de Quiroga colocará trampas contra a velutina no total de núcleos do municipio

Esta campaña levarase ao longo de marzo por este o mes que "recomendan os expertos para poder cazar as raíñas"

Exemplares de Vespa velutina./ Foto: Teodoro Suárez.

 

Durante o vindeiro mes de marzo o Concello de Quiroga ten previsto levar a cabo unha campaña de loita contra a Vespa velutina no conxunto do municipio. Nesta liña vai entregar a cada núcleo 5 trampas con líquido atraínte, que se renovará tres veces, pasando quince días entre cada renovación. “Serán máis de 500 trampas as que se colocarán a vindeira semana contando coa colaboración dos veciños, para tentar non erradicar pero polo menos diminuír o número de niños desta avespa invasora”, segundo informa o Concello de Quiroga.

Escolleuse este mes “por ser o que recomendan os expertos para poder cazar as raíñas, que é agora coa subida das temperaturas, cando abandonan os seus agochos para comezar a facer os niños primarios e poñer os ovos. Eliminando o maior número de raíñas é a maneira de evitar a proliferación da velutina”, engade este concello.

A recomendación que fai o concelleiro do Medio Rural e apicultor, Ángel Rodríguez Raposo, é que as trampas se coloquen “ao redor dos núcleos de poboación, preto das árbores máis temperás en florecer, xa que a avespa asiática buscará o seu alimento nos insectos que acudan a estas flores, incluídas as abellas que compoñen boa parte da súa dieta”.

Segundo Ángel Rodríguez, “Quiroga é unha zona na que prolifera este insecto invasor moi rapidamente, debido ao microclima do que se goza no val do Sil”. O pasado ano o Grupo de Emerxencias Supramunicipais (GES) retirou ou neutralizou máis de medio cento de niños de Vespa velutina.

Con esta campaña de trampeo, o Concello de Quiroga pretende “axudar nunha loita na que xa están traballando dende hai un par de anos os apicultores da comarca, pero para a que se precisa máis impulso posto que os niños de velutinas non están só preto das colmeas senón que xa se atopan por todas as zonas. É precisamente por iso polo que o concello pide a axuda de todos os veciños tanto na colocación das trampas que lles van entregar como na elaboración doutras como as que lles dan xa feitas, moi fáciles de realizar”, tal e como apunta esta administración local.

 

 

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close