O Concello de Ourense puxo nome e cara aos pinchos gañadores do concurso Sabores de Ourense, na súa edición primavera 2016. A través do departamento de Turismo e Termalismo, os premiados recibiron o seu recoñecemento nun acto que puxo no máis alto a seis establecementos hosteleiros da cidade: La Estación de Loman, Tapa Negra, A Saia da Carolina, Fuentefría, A Casa do Pulpo e A Casita do Pulpo.
Cinco foron as categorías e cinco os xurados aos que tiveron que namorar cos seus mellores ingredientes. Os establecementos participantes enfrontábanse nesta edición de primavera a un xurado profesional, ao premio do público, a un xurado da prensa, á categoría de ‘pincho celíaco’ e ao premio da APP #saboresdeOurense.
Deste xeito, o xurado profesional, composto polo premiado maitre e somelier Nacho Costoya, os representantes da Escola Hostelería Vilamarín,Eva Fachado e Eduardo Redondo, e o bloqueiro gastronómico José Luis Oliveira, decidiu outorgarlle a medalla de ouro a La Estación de Loman, polo seu pincho “Máscara”. O podio pechárono Tapa Negra, que obtivo prata co seu “Peta-Z”, e A Saia da Carolina, con bronce por “A horta da Carolina”.
Pola súa banda, o público que votou a través de máis de 2.300 papeletas concedeu o primeiro posto a Fuentefría, por “Un mar de fume”, acadando 243 votos. O segundo premio foi para A Casa do Pulpo, por “O rei do monte”, que conseguiu 161 apoios, e o terceiro para A Casita do Pulpo, coa súa tapa “Polbo na cama”, con 159 votos.
O xurado de prensa, composto polos xornalistas Paula Lodeiro e Higinio Osorio, declinou o seu veredicto en favor da Saia da Carolina, un dos máis premiados do certame. “A horta da Carolina” foi tamén o favorito na categoría de ‘pincho celíaco’, concedido pola delegación ourensá da Asociación de Celíacos de Galicia.
Por último, o público tamén decidiu gañador a través da APP #saboresdeOurense: Fuentefría, que se alzou tamén coa vitoria na categoría de votos por papeletas.
Na antesala dos galardoados tamén se quedaron como finalistas os establecementos de La Gula, Barallete, Bar Miguel, O Comellón, A cuqueira de Lourdes, Sybaris ou A Feira.
Texto: Sara Fontenla