O Centro Cultural “Marcos Valcárcel” acolleu hoxe, 20 de xuño, o I Congreso Red Locais “As entidades locais ante a Transparencia e a innovación”. Nesta xornada participaron o vicepresidente da Xunta, Alfonso Rueda; o presidente da Deputación, Manuel Baltar; o vicerreitor do Campus de Ourense, Virxilio Rodríguez; o director do grupo de investigación GEN, Santiago Lago; e a codirectora da Rede Locais, Concepción Campos.
O vicepresidente da Xunta, Alfonso Rueda, salientou a transparencia como instrumento de mellora das Administracións e a aposta pola colaboración para estendela a todos os concellos.
“A Xunta considera que a mellora continua da transparencia e da participación cidadá é un imperativo, xa que a cidadanía ten dereito a coñecer como funcionan as institucións e como se empregan os seus recursos”, indicou. Por este movito, o Goberno galego puxo en marcha o pasado ano a Lei de Transparencia.
Dende a Xunta sinalan que na pasada lexislatura, o goberno galego deu comezo un programa de medidas nesta materia, comezando no ano 2010, coa posta en marcha da Plataforma de contratación de Galicia, onde se pode acceder aos datos e documentos sobre os diferentes procedementos de licitación. E outras medidas como a publicación do primeiro Código Ético Institucional, ou a publicación da declaración patrimonial dos membros do Goberno. Toda esta información está, ademais, dispoñible no novo Portal de transparencia e Goberno aberto, que unifica nun único punto os datos que se atopaban dispersos en distintas páxinas webs.
Colaboración específica cos entes locais
A Xunta colabora cos concellos mediante un convenio coa Fegamp e a Universidade de Vigo para impulsar a mellora da transparencia nas entidades locais galegas e poñendo en marcha medidas que faciliten e fomenten a cultura da transparencia entre os concellos para acadar unhas administracións e uns gobernos transparentes, eficaces e eficientes.
O Goberno galego, nesta aposta por axudar e orientar ao resto das administracións galegas no cumprimento das súas obrigas, ten habilitada unha plataforma web no portal de eido local, na que os municipios que o desexen poden facer pública a información directamente ou ben enlazar con outras plataformas que xa tiveran en marcha.
