No marco do conxunto de encontros que está tendo con alcaldes da provincia de Ourense, na tarde deste venres 2 de outubro o novo delegado da Xunta en Ourense, Gabriel Alén, achegábase ata o Concello da Rúa para reunirse co alcalde Álvaro Fernández e dúas das súas concelleiras, María Teresa Varela e Joana Goméz para recoller as demandas do municipio e dos seus cidadáns. “Espero que sexa un encontro fructífero a curto, medio e longo prazo, tanto para A Rúa como para a comarca de Valdeorras”, dixo Alén.
Un encontro no que falaron do Centro de Saúde; da mellora da rede de abastecemento de auga e das infraestruturas do pobo. “Tamén tratamos da colaboración a nivel de desenvolvemento industrial xa que este ano temos concedida unha subvención para ampliar o vial do parque empersarial coa intención de que se asenten empresesas. Esperemos que todo siga no bo camiño e sigan tendo interese en establecerse”, dixo o alcalde da Rúa, despois de agradecer ao delegado a visita e desexarlle moitos éxitos no cargo.
Con respecto ao Centro de Saúde, un dos temas prioritarios abordados hoxe, Gabriel Alén asegurou que viña a “ratificar o preacordo entre Xunta, Deputación e Concello, con ese compromiso de que unha vez executada a urbanización se poida levar a cabo o Centro de Saúde que merece este concello”. No eido de reivindicacións, o delegado pudo comprobar en primeira persoa, no desprazamento dende Ourense, que “é moi necesaria a mellora das vías de comunicación e dos transportes e creo que temos moito que mellorar, tanto na reivindicación da A-76 como nos servizos ferroviarios. Dun xeito construtivo, todas as administracións debemos plantexar en que situación nos atopamos, poñer todo enriba da mesa e facer o posible por, como mínimo, manter os servizos que tiñamos antes da pandemia, se non melloralos”, dixo, engadindo que o resto de temas “serán revisados e trasladados á Xunta de Galicia polo ben común dos veciños da Rúa”.
Fotos: Carlos G. Hervella
