A localidade portuguesa de Viana do Castelo acollerá do 19 ao 21 de xuño a Mostra de Turismo das Cidades do Eixo Atlántico ‘Expocidades’, conformada polos municipios integrantes da Eurorrexión, entre os que figuran os ourensáns de Verín, O Carballiño, O Barco e Ourense cidade.
Neste salón turístico, que se instalará no Centro Cultural de Viana do Castelo, poderán visitarse uns 30 expositores das 28 cidades e entidades participantes que amosarán as posibilidades turísticas das mesmas. Unha oferta enfocada ao turismo de proximidade tendo en conta a relativa distancia que existe entre as urbes galegas e portuguesas e a variedade de ofertas turísticas ao visitante.
Paralelamente ao desenvolvemento da feira terán lugar outras actividades como degustacións de produtos típicos das cidades participantes, actuacións musicais, exposición de aves do zoolóxico de Maia durante unha das xornadas, proxección de vídeos documentais das cidades e encontros turísticos entre profesionais do sector. Nesta terceira edición, despois de pasar por Lugo e Pontevedra en anos anteriores, o deseño da feira tamén se axustará aos estándares de sostibilidade tanto no emprego de materiais reutilizables coma na separación dos residuos, entre outros. A entrada será gratuíta.
Neste escaparate turístico a Agrupación Europea de Cooperación Territorial Eurocidade Chaves-Verín (AECT-ECV) promoverá o destino Chaves-Verín, Eurocidade da Auga, a través dun stand conxunto de estética innovadora, “no que os técnicos dos dous municipios amosarán aos visitantes as potencialidades turísticas e promoverán este territorio como espazo turístico de proximidade. Tamén se divulgarán os diferentes recursos e información sobre os produtos turísticos da Eurocidade Chaves-Verín, primeiro destino transfronteirizo da Península Ibérica, como son o Camiño de Santiago, oferta hostaleira, gastronómica, termal e actividades culturais e deportivas realizadas no mesmo”, segundo se adianta dende esta entidade.
