A Xunta Local de Seguridade de Xinzo mantiña unha reunión na mañá do 6 de febreiro. Tiña lugar no Concello e estivo co-presidida polo subdelegado do Goberno en Ourense, Roberto Castro García, e polo tenente de alcalde do de Xinzo, Manuel Cabas López. Na reunión tamén participaban membros dos Corpos e Forzas de Seguridade do Estado e da Policía Local.
No decurso da xunta analizáronse os informes en materia de seguridade que afectan aos concellos de Xinzo da Limia, Os Blancos, Porqueira, Rairiz de Veiga, Sandiás e Vilar de Santos. Os datos aportados amosan una tendencia estable tanto no cómputo de faltas como de delitos no ano 2014, tras a notable baixada do total de infraccións penais; un 21,4 %, en 2013, segundo se informa dende a Subdelegación do Goberno en Ourense.
Outra das cuestións abordadas neste encontro foi o dispositivo de seguridade que se vai pór en marcha durante o Entroido neste municipio; que se concretou nunha planificación detallada de efectivos e medios, debidamente coordinados para que as actividades programadas dentro destas celebracións se desenvolvan con normalidade.
Con respecto a isto, o subdelegado do Goberno, manifestaba que agarda que esta importante celebración para Xinzo e a súa comarca “siga a servir de exemplo de comportamento festivo cívico e cordial, entre tódolos veciños e o gran número de visitantes que veñen de fora”.
