Ponse en marcha o programa de actividades lúdicas e culturais deseñado polo Concello de Quiroga entre os meses de marzo e xuño. “Dada a situación sanitaria, aínda que é boa, non se realizarán actividades que supoñan a xuntanza dun número importante de persoas. Nas que se realicen en interior manterase o límite de aforo permitido en cada momento”, matizan dende o Concello.
Unha desas primeiras propostas será o espectáculo “Máis Ritmo”, prevista para as 18h. do vindeiro 19 de marzo, festividade de San Xosé e Día do Pai. Desenvolverase pola rúa Real da Vila.
Trátase dun espectáculo cómico e musical de rúa dirixido por Fran Rei. Resulta moi versátil, contando coa música e o ritmo como protagonistas, mesturados con rutinas e gags cómicos. Achegará temas propios, versións de cancións populares, divertidos arranxos para un programa que transita por todos os estilos.
