O forno de fundición de campás da necrópole de San Vítor de Barxacova xa pode visitarse

Converterase no primeiro forno musealizado in situ de toda Galicia, “sendo ademais o máis antigo documentado ata o de agora”, segundo o concelleiro de Cultura de Parada de Sil

 

Forno de fundición e campás no xacemento de San Vítor de Barxacova (Parada de Dil)./ Foto cedida polo Concello de Parada de Sil.

A intervención arqueolóxica realizada enste verán no xacemento altomedieval de San Víctor de Barxacova (Parada de Sil) tense centrado na recuperación e restauración do singular foxo de fundición de campás atopado nas escavacións realizadas na campaña do 2013 e que era descuberto por completo no ano 2014. Esta actuación permitiu incorporalo á área visible e visitable do xacemento, xunto co extenso conxunto de sartegos antropomórficos que forman parte del.

“Tamén se recupera o aspecto orixinal de dous sartegos (o XXXIII e XXXIV), recolocando as tampas orixinais coas que foron descubertos en 2011, e baleiraranse outras co seu interior protexidas con terra para sometalas a labores de conservación. Para todos estes labores é preciso levar a cabo intensos traballos de restauración, precedidos da reescavación do forno, que se iniciou esta mesma semana”, informa o concelleiro de Cultura de Parada de Sil, Paco Magide.

O foxo de fundición vaise converter ademais no “primeiro forno musealizado in situ de toda Galicia, sendo ademais o máis antigo documentado ata o de agora, xa que se teñen localizado outros na cidade de Ourense (en San Francisco e na contorna da Trinidade) ou en Leiro nos últimos anos, todos eles vinculados a igrexas ou mosteiros, pero datados todos eles entre os séculos XVII e XVIII. O de San Vitor, en cambio, con certas diferenzas tipolóxicas, datouse por termoluminiscencia dos barros que o recubrían entre o século IX e X, sendo contemporáneo ao período útil da necrópole e da capela do San Vítor”, resalta Magide.

Esta intervención está sendo realizada polo equipo de arqueólogos e restauradores que dende 2010 veñen desempeñando as labores de estudo e posta en valor da necrópole, que se complementarán este ano coa colocación dun novo panel explicativo do forno das campás, incorporando tamén nova información virtual á rede de recursos naturais e patrimoniais xa dispoñible na actualidade a través dunha aplicación web.

“Esta nova posta en valor e aposta polo patrimonio é posible”, sinala a alcaldesa de Parada de Sil, Yolanda Jácome, “despois do convenio asinado coa Consellería de Educación e Cultura, Dirección Xeral de Patrimonio da Xunta de Galicia”. Tamén dende o Concello anímase a facer visitas estes días, xa que ao estar elí os restauradores e arqueólogos sempre se poden pedir explicacións polo miúdo.

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies