En portadaÚltima hora

O Goberno decide prorrogar ata o 26 de abril o estado de alarma polo coronavirus

A medida deberá ser aprobada novamente no Congreso dos deputados

Pedro Sánchez presidindo a reunión do Comité Técnico sobre o coronavirus, COVID-19, este sábado./ Foto: Pool Moncloa/Borja Puig de la Bellacasa

 

Será a segunda prórroga en apenas 15 días. O presidente do Goberno de España, Pedro Sánchez, anunciaba nunha comparecencia pública a primeira hora desta tarde de 4 de abril a decisión de prorrogar dúas semanas máis o estado de alarma no país. Unha decisión que se tomaba despois dunha xuntanza co comité científico.

“O Consello de Ministros do próximo martes solicitará de novo a autorización do Congreso dos deputados para prorrogar o estado de alarma ata as 24h. do 25 de abril”, dicía Sánchez, quen insistía en que “dobregar a curva e deixar atrás o pico é o obxectivo que nos marcamos e estamos preto de alcanzalo”. E para iso nas vindeiras semanas búscase “reducir aínda máis a propagación”. Nese senso, o presidente matizaba que, “con todas as cautelas, cremos que esas dúas semanas son o tempo que necesita o noso sistema de saúde para recuperarse e a nosa sociedade para manter a raia o virus e iniciar a desescalada”.

Quedan, por tanto, varias semanas “de restricións estritas nas que pedimos ás familias que permanezan en casa”. Sánchez resaltaba así mesmo que “estamos ante a gran crise das nosas vidas, atopámonos ante unha encrucillada histórica”.

Máis prorrogas pero con restricións que se irán modulando

Ademais non será a última prórroga desta situación excepcional, “van ser máis de quince días, pero non significará que teñamos o mesmo estado de alarma. Cando dobremos a curva empezaremos a recuperar algúns espazos de relación social, que perdimos ou aos que renunciamos para protexer as nosas vidas e aos dos nosos seres queridos, espazos da nosa vida persoal, económica e social”, anunciaba Pedro Sánchez.

E ante as preguntas dos medios, o presidente do Goberno concretaba que a partir do 9 de abril a idea é que empresas non esenciais recuperen a actividade. “Prorrogaremos o estado de alarma que aprobamos hai 15 días, pero non a medida extraordinaria que aprobamos aproveitando a Semana Santa e que despois dela non ten razón de ser. E, en función de como sexa a evolución, iremos modulando ese estado de alarma. Esta é unha crise dinámica e reaccionaremos en función de como vaia a evolución da pandemia”.

O presidente do Goberno facía tamén unha chamada á unidade da sociedade, dos axentes sociais e tamén das forzas políticas, “imos traballar nuns novos pactos da Moncloa para relanzar e reconstruír a nosa economía e o noso tecido social”.

Nesa liña, aseguraba que, “unha vez teñamos controlada a difusión do virus, abrirase unha segunda etapa que será a do regreso progresivo a unha nova normalidade social e a unha reconstrución da nosa economía” para a que o Goberno está xa ultimando un plan.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close