O grupo de traballo encargado de atopar unha solución para os contedores soterrados, pechados polo seu mal estado, mantivo hoxe unha reunión, a cuarta, coas empresas auditoras e de certificación de seguridade coa fin de analizar os custes da solución, que os catro grupos con representación no Concello que conforman este grupo, adoitaron por consenso; a da posta a punto das 75 estacións de recollida selectiva de lixo na cidade.
As diferentes variables pasan pola posta a punto, substituíndo o sistema electro mecánico por outro mecánico, a certificación, o cambio de cubetas -parcial ou total- ademais doutras coma a impermeabilización dos ocos máis prexudicados ou servizo de mantemento.
Os diferentes grupos expuxeron os seus puntos de vista na xuntanza, perseguindo en todo momento, explican dende o Concello, “o custe máis vantaxoso para as arcas municipais” combinado coas máximas garantías de seguridade posibles. Neste sentido, o concelleiro delegado de Medio Amniente, José Araújo, manifestou a súa intención de atopar unha solución satisfactoria para todas as partes e que consiga desbloquear o arranxo dos contedores da forma o máis áxil posible.
As solucións que se achegarán a esta problemática deben de ser singularizadas, xa que non todas as estacións de recollida se atopan na mesa situación de deterioro. Porén, a proposta do grupo de goberno municipal quere ser o máis áxil posible e axeitada para todos os casos e mesmo para garantir a súa mellor funcionalidade nos anos vindeiros para que non se produzan reparacións correctivas e o seu mantemento, din, garanta a lonxevidade dun servizo non operativo dende o ano 2014.
O concelleiro, José Araújo, relatará nos vindeiros días a proposta definitiva para o arranxo dos contedores soterrados en función das diferentes opinións expresadas na xuntanza desta mañá.