SanidadeÚltima hora

O Hospital de Ourense, nun ensaio clínico da vacina de ARNm para previr recaídas de cancro colorectal

O estudo procura o deseño de vacinas personalizadas e de precisión para estimular a inmunidade de pacientes de alto risco co obxectivo de evitar unha recaída

Exterior do Hospital Universitario de Ourense./ Foto: Carlos G. Hervella.

 

O Servizo de Oncoloxía da Área Sanitaria de Ourense, Verín e O Barco de Valdeorras está a participar na fase II do ensaio clínico da vacina para previr recaídas de cancro colorectal, que está a desenvolver BioNTech coa tecnoloxía de ARN mensaxeiro que se empregou, por vez primeira, na súa vacina fronte a Covid-19.

O obxectivo deste innovador estudo no que xa están a participar pacientes ourensáns é procurar unha terapia inmunolóxica de precisión, que permita conseguir unha vacina personalizada para cada paciente. Neste caso, aqueles nos que tras unha proba altamente específica, biopsia líquida, se determine o risco de recaída.

O cancro colorectal, tras ser operado nas dúas primeiras estadías desta enfermidade, II de alto risco e III, recibe quimioterapia para evitar que o tumor recaiga. Non obstante, subliña Ana Fernández Montes, oncóloga do Hospital Universitario de Ourense e responsable do ensaio clínico, “no subgrupo no que detectamos ADN tumoral circulante en sangue, existe un alto risco de que o tumor recáia a pesar de recibir quimioterapia” .

Ademais, Fernández Montes, sinala que a quimioterapia non sempre é eficaz neste pequeno subgrupo de pacientes, nos que ata agora a única opción é extremar a vixilancia e control, polo que centran os esforzos de investigación “Unha das vías de investigación de vangarda neste intre é o deseño de vacunas ARN, que neste caso veñen da man da empresa BioNTech.” dí a oncóloga.

Os pacientes son seleccionados en función do risco de recidiva do tumor, que se determina antes de iniciar o tratamento de quimioterapia mediante unha biopsia líquida -para a que só é preciso unha mostra de sangue- que “de ser positiva, en función das mutacións que teña o tumor de cada pacente, servirá para deseñar unha vacina específica para cada enfermo.” explica Montes.

 

Ana Fernández Montes, investigadora principal do ensaio clínico./ Cedida.

 

Destacada participación galega

Neste intre xa son 14 os pacientes ourensáns os que participan no ensaio clínico, e as previsións son chegar aos 40. Neste aspecto, Ana Fdez. Montes destaca o compromiso e colaboración dos pacientes de Ourense e agradece a súa dispoñibilidade a participar, o que permite ao Servizo de Oncoloxía manter unha intensa actividade investigadora, e convirten ao hospital público de Ourense nun potencial candidato a colaborar en proxectos desta entidade e vangarda, á altura de hospitais universitarios e institucións de toda Europa.

Dos trece hospitais que participan no ensaio en España, tres son galegos, sumándose ao de Ourense os de Santiago de Compostela e A Coruña, que tamén forman parte do selecto grupo integrado polos prestixiosos Clinic, Val d’Hebron e Santa Creu i Sant Pau, de Barcelona, os hospitais de La Paz, San Carlos e Gregorio Marañón de Madrid, a Clínica Universitaria de Navarra, o Hospital General de Valencia, o Miguel Servet de Zaragoza ou o Centro Integral Oncológico Clara Campal (CIOCC) de Madrid.

A nivel mundial o ensaio está neste intre tamén en activo en dez centros de Estados Unidos, en catro de Bélxica e en once de Alemaña, país de orixe de BioNTech.

O reto das vacinas de ARNm

BioNTech está dedicada ao desenvolvemento e fabricación de inmunoterapias activas, para lograr un enfoque específico do paciente no tratamento de enfermidades graves, por medio do ARN mensaxeiro para o seu uso en enfermidades, coma o cancro; infecciosas coma o Covid-19; na terapia celular diseñada: ou noutras enfermidades raras, a partir do remplazo de proteínas.

Desta forma, co avance que supón a técnica de ARN mensaxeiro, ábrese un amplo abano de novas posibilidades de tratamento, e podería converterse nunha resposta terapéutica, para tratar ou curar numerosas enfermidades existentes ou outras novas, que ata agora non se podería imaxinar.

Artigos relacionados

Back to top button