A provincia de Ourense rexistra un total de 1.516 casos activos de coronavirus, segundo os datos que vén de facilitar a Consellería de Sanidade (actualizados ás 18h. do 18 de outubro). Son 61 menos que os de onte, se ben nas últimas 24 horas confirmábanse mediante probas PCR 66 novos casos.
Do total de casos activos, 104 están ingresados en planta (6 máis que onte) e 14 na Unidade de Coidados Intensivos (1 máis que onte). O Hospital de Valdeorras suma nesta xornada un novo ingreso en planta e sitúase en 4, mentres o Hospital de Verín mantén 8 ingresos en planta e o Hospital Universitario de Ourense conta con 91 ingresos en planta (5 máis que onte) e 13 na UCI (1 máis que onte).
Ademais o Centro Médico El Carmen ten 1 ingreso en UCI e a Clínica Santa Teresa outro en planta.
O total de casos na provincia ascende a 5.384, con 3.676 curados e 193 falecidos. Ata o de agora lévanse realizado 80.289 probas PCR.
Os datos galegos
A Área Sanitaria de Ourense, Verín e O Barco segue sendo a máis afectada polo Covid. Así dos 5.101 casos activos de coronavirus, 852 son da área da Coruña, 483 da de Lugo, 1.516 da de Ourense, 475 da de Pontevedra, 791 da área de Vigo, 762 da de Santiago, e 222 da de Ferrol.
Do total de pacientes positivos, 46 están en UCI, 266 en unidades de hospitalización e 4.789 no domicilio. Polo de agora, en Galicia hai un total de 23.578 persoas curadas, rexistrándose 822 falecementos. O número de PCR realizadas é de 592.162.
