Diminúe o número de pacientes con Covid-19 ingresados en planta no Hospital Público de Valdeorras. Segundo os datos notificados hoxe pola Consellería de Sanidade (actualizados ás 18h. do 3 de decembro), son 5 as persoas hospitalizadas en planta, 3 menos que onte. No caso do Hospital de Verín mantén 2 ingresos (os mesmos que onte) e o Hospital Universitario de Ourense rexistra 32 en planta (2 máis que onte) e 6 (os mesmos que onte) na Unidade de Coidados Intensivos.
Con respecto aos casos activos de Covid-19 na Área Sanitaria de Ourense, Verín e o Barco de Valdeorras, segundo os datos notificados pola Consellería de Sanidade, rexístranse 436 positivos (14 menos que onte), mentres as hospitalizacións en planta son 39 (1 menos que onte) e 6 na UCI (as mesmas que onte). Os novos casos confirmados por PCR nas últimas 24 horas baixan a 22 (fronte aos 41 de onte).
O total de casos rexistrados ata o de agora na provincia ascende a 7.634, con 6.903 curados e 294 falecidos. Polo de agora lévanse realizado 117.057 probas PCR e 65.080 probas serolóxicas.
