Tras o falecemento rexistrado onte, o Hospital Público de Valdeorras ten neste sábado 6 pacientes con coronavirus ingresados en planta, segundo a última actualización de datos da Consellería de Sanidade. No Hospital de Verín hai 1 ingreso en planta e no Hospital Universitario de Ourense son 61 os ingresados en planta e 3 en UCI (estes últimos con prognóstico grave).
Dos 426 casos activos hoxe na Área Sanitaria de Ourense, Verín e O Barco de Valdeorras, 355 permanecen a seguemento a domicilio, 68 están ingresados en planta e 3 en UCI, segundo Sanidade.
O total de casos rexistrados na provincia de Ourense elévase a 1.902, con 1.353 curados e 123 falecementos (residencias e hospitais). Ademais lévanse realizado 17.116 probas PCR.
Datos en Galicia
O número de casos activos de coronavirus en Galicia ascende a 2.758, deles 650 son da área da Coruña, 166 da de Lugo, 426 da de Ourense, 147 da de Pontevedra, 754 da área de Vigo, 500 da de Santiago, e 115 da de Ferrol.
Do total de pacientes positivos, 24 permanecen en UCI, 183 están en unidades de hospitalización e 2.551 no domicilio. Polo de agora, en Galicia hai un total de 7.225 persoas curadas, rexistrándose 591 falecementos.
A cifra de PCR realizadas é de 113.167.
