CulturaCulturaEducaciónÚltima hora

O IES Lauro Olmo do Barco únese ao programa de dinamización lingüística “21 Días co Galego e +”

O IES Lauro Olmo do Barco é un dos centros que participa no programa. /Foto: Mónica G. Bellver.

 

Cos obxectivos de que a xente nova fale máis galego e perfeccione o seu uso tanto dentro como fóra das aulas, a Xunta pon en marcha desde hoxe a III edición do programa de dinamización lingüística 21 Días co Galego e +, que conta coa participación dun total de 3738 persoas (alumnado, profesorado e persoal de administración e servizos) de dez centros, entre eles o IES Lauro Olmo do Barco de Valdeorras.

O secretario xeral de Política Lingüística, Valentín García, participaba esta mañá na videorreunión de apertura do programa xunto cos centros educativos, e aproveitou para agradecer “o esforzo do profesorado, especialmente dos equipos de dinamización da lingua galega, e da comunidade educativa en xeral”, xa que “aínda que o alumnado é o protagonista, o profesorado, as ANPAS e as familias ou o persoal de administración e servizos dos centros educativos participantes son determinantes para o éxito da actividade”.

 

O secretario xeral de Política Lingüística, Valentín García, reúnese por videoconferencia cos centros participantes na nova edición de “21 Días co Galego e +”.

 

Entre as novidades, e na súa aposta por medrar dinamizando, o programa esténdese de maneira piloto á etapa de Primaria no CPR A Inmaculada de Lugo coa participación de alumnado de 3º, 4º, 5º e 6º desta etapa. Ademais de incluír alumnado desde os 8 anos neste centro de Lugo, súmanse tamén á iniciativa os IES coruñeses As Mariñas (Betanzos), Carral e Lamas de Abade (Santiago de Compostela); o Perdouro (Burela); os ourensáns Lauro Olmo (O Barco de Valdeorras) e Taboada Chivite (Verín); e os pontevedreses Ramón Cabanillas (Cambados), Sánchez Cantón e Santa Irene (Vigo).

Ademais, incorpora tres importantes colaboracións externas: a do programa Galicia por Diante da Radio Galega, que terá unha sección diaria ao longo do seu desenvolvemento na que os centros lle contarán á audiencia os temas que abordaron e como está a ser a súa participación; a do programa #DígochoEu! da TVG, con encontros entre o equipo audiovisual e os dez centros educativos participantes e tamén coa realización de vídeos propios do formato deste espazo de grande éxito entre a mocidade; e a do Foro Peinador, que achegará o eido da empresa en galego aos centros educativos para poñer en valor a importancia do mundo laboral no desenvolvemento cultural da sociedade.

Todo isto poderase seguir desde o blog 21 Días co Galego e + e tamén desde o Portal da Lingua Galega.

 

Artigos relacionados

Back to top button