A Consellería do Medio Rural vén de declarar nesta noite como medida preventiva a “Situación 2” no incendio forestal activo arestora na parroquia de Barxa, pertencente ao municipio ourensán da Gudiña. “Esta situación operativa de emerxencia declárase por proximidade do lume ao núcleo do Seixo”, tal e como indica Medio Rural.
Este incendio, que comezou en Portugal, entraba en Galicia ás 19:07 h. e arestora permanece activo. Segundo as primeiras estimacións, afecta máis de 20 hectáreas. No seu control levan traballado 1 técnico, 6 axentes, 13 brigadas, 9 motobombas, 3 pas, 4 helicópteros e 2 avións, segundo Medio Rural.