Das lembranzas e historias de antepasados que viven entre os rueiros da aldea, e que seguen vivindo na memoria dos veciños, nace Una oscura sombra del pasado (Autografía, 2021), a primeira novela de Maikel Núñez (Terrasa, 1982), cuxas orixes e a segunda residencia están na Pobra de Trives, en pleno Macizo Central Ourensán, o seu retiro espiritual e “o lugar onde cada ano cargo as pilas e descanso do día a día”, asegura o escritor.
Ambientada na Galicia rural, concretamente en Trives con referencia a outros lugares como Ourense, Castro Caldelas, o val do Navea ou a central de Pontenovo, a obra conta a historia de Hugo, un mozo de cidade que volve durante un tempo á vella casa dos seus avós onde se atopa, por casualidade, rebuscando no pasado oculto da súa familia.
E precisamente no lugar en que está inspirado, na Pobra de Trives, será presentado o libro, a primeira obra deste escritor novel, nun acto que terá lugar mañá, sábado 20 de agosto, na Casa Grande.