O líder e membro fundador do grupo Luar na Lubre, Bieito Romero, será o primeiro “Gaiteiro da Catedral” que interpretará o himno oficial da provincia, “Ourense no solpor”, desde a torre da catedral de Ourense. Será mañá, 30 de xuño, no primeiro acto da homenaxe mundial permanente ás vítimas do Covid-19 e ao persoal esencial que traballou durante os meses da pandemia, un evento organizado pola Deputación de Ourense, o Bispado e a Catedral de Ourense, que terá lugar na praza de San Martiño da capital ourensá.
Alí, ás 11.30 horas (hora emblemática que representa o 11 de marzo, día en que a OMS decretou a pandemia mundial), Bieito Romero, músico de orixe ourensá e Fillo Adoptivo do municipio de Esgos, “subirá á torre do templo, ataviado coa Capa do “Gaiteiro da Catedral”, que se estrea nesta ocasión, e iniciar a homenaxe mundial permanente ás vítimas o Covid-19 e ao persoal esencial na pandemia”.
