Seis concellos, catro magos e un total de quince espectáculos. Son os ingredientes cos que se cociñou a primeira edición do Festival Terra Máxica organizado por Culturactiva S. Coop. G e a colaboración dos Concellos implicados: Baños de Molgas, Barbadás, Verín, Viana do Bolo e A Rúa. Neste último, O Mago Teto pechaba co seu espectáculo “Tolemaxias” o circuíto que arrancaba a comezos de abril.
O primeiro en pisar o escenario do Centro Cultural Avenida da Rúa, foi o Mago Paco con “Hocus Pocus” o domingo 3 de abril. Ao domingo seguinte, 10 da abril tocaríalle o turno a Fran Rei co seu espectáculo “A historia de Brancaflor”. E xa na tarde do domingo 17 d abril, era o vianés Mago Teto o que facía rir e encandilaba ao público coas súas historias, chistes, anécdotas e trucos de maxia.
Coma sempre, os nenos foron os protagonistas (pero non os únicos destinatarios) dos xogos do Mago Teto quen, sobre o escenario rues, non deixou títere con cabeza interactuando co público e facendo constantes referencias ao lugar así como ás súas anteriores visitas á Rúa Vella e mesmo ao primeiro truco que aprendeu do seu avó, hai xa vintecinco anos.
Xunto ao Mago Teto, o Mago Paco e Fran Rei, Dani García completou o cartaz desta primeira edición do festival de maxia, ilusión e fantasía pola provincia de Ourense.
Fotos: Carlos G. Hervella
