O Centro Cultural “Marcos Valcárcel” vai facer unha enorme “performance” homenaxe a Carlos Casares, homenaxeado nas Letras Galegas 2017, de grandes dimensións. Para iso empregará una apisoadora coa que crearán un gravado xigante. Está previsto que o espectáculo arranque cara ás 18:00 horas de mañá sábado, 27 de maio.
Os artistas Fonso Castro, Isabel Somoza, Xabier de Sousa e Xosé Poldras coordinarán esta iniciativa de homenaxe ao mundo literario de Casares coa estampaxe dun gravado abstracto “onde a creación de varias texturas de diferente natureza evocan momentos distintos dos textos de “Ilustrísima”, “Os mortos daquel Verán”, “Vento ferido” e “O sol daquel Verán”, principalmente”, informaron dende o Centro Cultura. Este gravado vai ser estampado na rúa, ao carón do “Marcos Valcárcel”, “para que o público poida apreciar parte do proceso de creación dunha obra gráfica, pois a matriz a estampar chegará feita previamente, o mesmo que o papel que recibirá a imaxe”, apuntan. Este papel especial e artesanal tamén foi feito polos artistas expresamente para o proxecto.
Despois da estampaxe, o público poderá facer o seu propio gravado orientado polos artistas nas cuestións técnicas, polo que non é preciso ter coñecementos específicos. Haberá dúas pranchas dispoñibles para realizar en grupo e todos os materiais necesarios.
As imaxes dos artistas e do público serán transferidas ao papel usando unha apisoadora, o que engadirá ao acto un certo carácter de “performance” polo que ten a máquina de posta en escena e pola participación do público na creación do resultado final.
O Centro Cultural “Marcos Valcárcel” tenta, a través de esta iniciativa, achegar á cidadanía a visión interior do traballo dos artistas, abre o labor destes á colaboración directa cos cidadáns e fai visible unha obra que perdurará no tempo do escritor a quen este ano se lle dedicou o Día das Letras Galegas.
