A partires das tres desta tarde de sábado 7 de abril porase en marcha a competición deportiva de descenso de augas bravas no Barco. Darase a saída da primeira das mangas da Copa España sprint, dende a zona das Cortes. A proba terá unha distancia duns 300 metros. A segunda manga comezará ás cinco horas.
Xa na xornada do domingo 8 de abril terán lugar outras dúas regatas. A primeira delas será a Copa España clásica individual, con saída dende as Corte ás nove da mañá, estando a súa meta nas proximidades da desembocadura do regato Mariñán no Sil. Esta cita será ademais campionato galego nesa modalidade. Despois, ao mediodía, disputarase o Campionato de España por patrullas, tamén na modalidade clásica. Como punto de partida terá novamente As Cortes.
Esta competición reúne a nove clubs de diferentes puntos de España e a uns 60 piragüistas. Entre eles haberá media ducia do Fluvial Barco, organizador deste evento deportivo en colaboración coa Federación Galega de Piragüismo e co Concello do Barco.
