Jorge De Álvarez segue vestindo a celebridades, dentro e fóra da pequena pantalla. Desta volta a creatividade do modisto vianés lucía da man dunha das galardoadas na XX edición dos Premios Mestre Mateo que se celebraba o sábado.
A verinesa Esther Estévez Casado recollía dous premios: un ao Mellor Programa por ‘Dígocho eu’ e outro á Mellor Comunicadora, vestida cun elegante traxe feito en Viana do Bolo.
Tal como explica o propio modisto, para Esther creou un deseño inspirado na actuación das Tanxugueiras do Benidorm Fest, dando como resultado un dúas pezas en cor negra (corpiño e saia longa con cola) con bordados ao aire, e xoiería de Bulideira.
Agradecido pola oportunidade, Jorge espera volver para a seguinte edición dos premios, “a ver se pode ser como nominado a mellor vestiario”, di, medio en broma medio en serio.
