ConcellosÚltima hora

O obradoiro dual “Ribeiro en marcha” forma 20 desempregados para ter acceso ao mundo laboral

Arnoia, Beade, Cenlle, Cortegada e Leiro serán os concellos que formarán durante 9 meses aos alumnos. Promovida pola Mancomunidade do Ribeiro, conta cun investimento da Consellería de Economía de máis de 295.000 euros e rematará a mediados de agosto

 

A iniciativa “Ribeiro en marcha” coa delegada territorial da Xunta.

 

“Ribeiro en marcha”, a iniciativa de emprego promovida pola Mancomunidade do Ribeiro, consiste na oferta de 20 prazas para desempregados achegados dos concellos de contratos de formación e aprendizaxe durante 9 meses que permita abrir portas a un futuro laboral. Estes obradoiros de emprego permiten, a súa vez, recibir aos participantes un certificado de profesionalidade con validez en todo o Estado.

A oportunidade consite en 9 meses de formación en obradoiros para especializarse en actividades auxiliares en viveiros, xardíns e centros de xardinería e en fábrica de albanelería. Este tipo de programas mixtos de formación e emprego céntranse na realización de obras ou prestación de servizos de interese xeral e social que posibilitan un traballo que, xunto coa formación profesional para o emprego, procura a cualificación profesional e favorece a posterior inserción laboral das persoas desempregadas que o realizan. Tamén posibilitan que os participantes ademais de recibir formación tamén perciban o salario mínimo interprofesional.

Os 20 alumnos que se están a formar e traballar neste obradoiro realizan labores xardinería e albanelería en núcleos de poboación dos concellos pertencentes a esta entidade supramunicipal: Arnoia, Beade, Cenlle, Cortegada e Leiro. Como novidade desta modalidade dual, cabe destacar que agora permite que parte dos seus participantes conten, unha vez finalizado o período de formación, cun contrato en prácticas de polo menos 3 meses nunha empresa emprazada na zona.

A formación ten previsto rematar a mediados do vindeiro mes de agosto e durante os nove meses da súa duración o alumnado desenvolve, entre outras actuacións, o acondicionamento do espazo público para lecer nas Lombas, en Arnoia; a zona verde na área do Salgueiral e a cubrición dos vestiarios do campo de futbol de San Bartolomé, en Leiro; a recuperación ambiental do paseo das bieras do río Miño e a construción de beirarrúa e de zona axardinada fronte á Casa Consistorial, en Cenlle; a mellora de espazos públicos en Beade; e a recuperación dun sendeiro no parque termal A Carballeira e axardinamento das zonas verdes do campo da feira, en Cortegada.

A delegada territorial da Xunta, Marisol Díaz Mouteira, visitou esta iniciativa de emprego, animando aos alumnos a “aproveitar ao máximo a oportunidade que se lles brinda” e a seguir mellorando a súa cualificación para acceder a un posto de traballo. Tamén lembrou o compromiso da Xunta cunha formación adaptada aos novos perfís profesionais e ás demandas actuais do tecido empresarial.

A Consellería de Economía, Emprego e Industria impulsa na provincia de Ourense un total de 21 obradoiros nos que inviste 5,6 millóns de euros e que beneficiarán a 402 persoas en situación de desemprego. Dos 21 programas mixtos, 18 son duais e o resto, son específicos para menores de 30 anos, unha iniciativa que forma parte do Sistema Nacional de Garantía Xuvenil para seguir impulsando o emprego entre a mocidade.

Texto: Carlota Pérez de Juan Burgos

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close