Cita deportiva, pero sobre todo solidaria, o vindeiro 5 de maio na Rúa. Nesta localidade valdeorresa celebrarase a IV Carreira e Andaina contra o Cancro, que nesta edición terá como padriño ao doutor Jesús García Mata, xefe do servizo de Oncoloxía Médica do Hospital Universitario de Ourense (CHUO).
Esta proba popular densevolverase ao longo dun circuíto de 8.500 m. A súa saída e meta estará na Estación de Autobuses da vila. Os primeiros en competir serán os camiñantes ás 11h. Media hora despois comezará a carreira absoluta (8.500 m), e a partir das 11:40h. daranse as saídas (cada dez minutos e por esta orde) dos Sub18-Sub16 (2.200 m), Sub14 (1.000 m), Sub 12 (500 m), Sub10 (300 m), Prebenxamíns e Chupetíns (150 m). A proba será organizada polo Club Atletismo Rúa do Concello da Rúa, Gadis, Iberdrola e a Deputacion de Ourense.
As persoas interesadas en participar poderán inscribirse ata as 23:59 horas do venres 3 de maio de de modo online en www.galitiming.com ou presencialmente nas tendas TriSport da Rúa e do Barco. O custe da inscrición é de 10 para maiores de 16 anos e de 5 euros para os menores de 16.
O recaudado será doado á delegación da Asociación Española contra o Cancro (AECC) en Valdeorras. Tamén haberá un dorsal 0 “para todo aquel que queira aportar se non pode vir ao evento”, din os organizadores.
O programa deste evento concluirá coa entrega de trofeso, prevista para as 13:20h, seguido dun sorteo de regalos doados por adegas e por establecimientos comerciais de Valdeorras ás 13:30 h.
