Castrelo de Miño programa para esta fin de semana unha nova edición do seu Ribeiro Blues Wine Festival, que fará do Parque Náutico o escenario ideal para gozar duna boa copa de viño acompañado da mellor música ao vivo. A inauguración será o venres ás 21 horas e está previsto que asista o alcalde da localidade, Xurxo Rodríguez, e o presidente do Consello Regulador da DO Ribeiro, Felicísimo Pereira, entre outros. 24 serán as adegas que participen nesta iniciativa.
Na mesma xornada do venres, o blues correrá a cargo de Freedonia, Marian Ledesma & Los Tinaquero Brothers, Johnny Cat & The Poor Dogs e Gold&Colt. O sábado, a festa continuará da man da célebre Vargas Blues Band, así como outros grupos galegos como The Lákazans e Los Hermanos Zapruder. Tamén haberá espazo para o folclore galego da man do grupo O Fiadeiro.
Para completar o festival, haberá unha zona de streetfood, con restaurantes e postos de comida na rúa, así como actividades náuticas como vela ou pedaletas. E mesmo se poderán realizar catas de viño no medio do encoro no catamarán do concello. O enofestival tamén conta con zona de acampada libre.
Tamén haberá transporte en autobús dende a cidade de Ourense. As paradas serán na rúa Ervedelo, no Couto, no barrio da Ponte, en Quintela, Untes, Santa Cruz, Barbantes, Laias e Ribadavia. O retorno será ao remate do festival. Terá un custe de 9 euros (ida e volta) e deberase reservar praza nos teléfonos 988 242 819 (viaxes Piña), 988 225 288 (Anpian) ou 988 493 000 (Concello Castrelo de Miño).
